BESËLIDHJA- VLLAZNIA, BARAZIM 1-1 NË MIQËSORE

Pas dy fitoreve me Kastriotin dhe Tërbunin, ekipi I Vllaznisë nuk ka arritur të bëjë të njëjtën gjë në miqësoren e rradhës me një tjetër ekip të kategorisë së parë. Ndaj Besëlidhjes, kuqeblutë nuk kanë shkuar më tepër sesa barazimi 1-1. Takimi është luajtur pasditen e së shtunës në stadiumin “Brian Filipi” të qytetit të Lezhës dhe për ndjekjen e tij ka patur jo pak interes nga tifozëria vendase. Shkodranët e kanë nisur ndeshjen me formacionin e tyre më të mirë teksa në portë ka qenë Selimaj dhe më pas, Gocaj, Pjeshka, Orelesi, Gurishta, Krymi, Tafili, Hasani, Lika, Vecaj dhe Atsina.

Pjesa e parë e ndeshjes është mbyllur në barazim pa gola ndonëse Vllaznia ka patur disa raste të pastra shënimi por që nuk janë shfrytëzuar nga lojtarët e saj. Në fillimin e pjesës së dytë, trajneri Cungu ka aktivizuar disa lojtarë të tjerë dhe njëri prej tyre, pikërisht mesfushori Arsid Kruja ka kaluar në avantazh ekipin e tij. Pas një krosimi nga e djathta, ai ka goditur saktë me kokë duke e dërguar topin në rrjetë. Pas këtij goli u mendua se do të kishte edhe të tjerë por në fakt nuk ka ndodhur kështu. Kuqeblutë kanë humbur sërish disa raste ndërkohë që në minutën e 76-të, Ujka do të shënonte për Besëlidhjen, duke barazuar shifrat dhe për rrjedhojë ky rezultat nuk do të ndryshonte më deri në fund. Gjatë pjesës së dytë, në portën e ekipit shkodran është aktivizuar edhe maqedonasi Naumovski I cili ka ardhur në provë për të cilin ende nuk ka një vendim nëse do të qëndrojë apo jo. Me barazimin ndaj lezhjanëve, Vllaznia mbyll serinë e miqësoreve me ekipet shqiptare në prag të nisjes së sezonit të ri.

Ajo ka arritur dy barazime me të njëjtin rezultat 1-1 ndaj Laçit dhe Besëlidhjes ndërkohë që ka arritur edhe dy fitore, përkatësisht 4-0 me Kastriotin dhe 1-0 me Tërbunin. Megjithatë, këto miqësore nuk tregojnë fytyrën e vërtetë të ekipit shkodran që pritet të përmirësohet edhe më tepër në të ardhmen.

Lexoni dhe kete

VOLEJBOLL, VLLAZNIA NË PRITJE TË RIKTHIMIT TË QAFARENËS

Vllaznia në volejboll për meshkuj ka nisur përgatitjet për sezonin e ri në të cilin …