BRUNO KOLA SHPALLET KAMPION NË GARËN E REZISTENCËS

Sukseset e çiklistëve shkodranë vazhdojnë sërish. Ditën e djeshme është zhvilluar gara tjetër e kampionatit kombëtar të këtij viti, ajo e rezistencës. Itinerari i saj ka qenë 10 xhiro në një pjesë të rrugës Tiranë- Elbasan, me një distancë të përgjithshme prej 100 kilometrash. Gara ka qenë e fortë dhe me më shumë rivalitet. Natyrisht që pretendenti kryesor për fitimin e saj ka qenë çiklisti i Vllaznisë Bruno Kola i cili natyrisht që kërkonte të sfidonte sportistin e ardhur nga Italia Mesud Cepa që u pat shpallur një ditë më parë kampion në kronometër. Gara ka qenë e bukur dhe ndonëse gjatë saj ka patur tentativa të herëpashershme për shkëputje, pretedentët kanë shkuar të gjithë sëbashku deri në metrat e fundit të etapës.

Pikërisht aty, ka dalë në pah strategjia e ekipit shkodran dhe falë punës së mirë të bërë nga Sion Gjoka e Alfons Rrashkadoli, në fund ka qenë kolegu i tyre Bruno Kola që nuk është arritur nga askush tjetër duke e prerë i pari vijën e mbërritjes. Menjëherë pas tij ka mbërritur një tjetër çiklist i Vllaznisë, Astrit Kronaj që është renditur i dyti ndërsa në vend të tretë është renditur Amarildo Goga i Apolonisë. Fituesi i kësaj gare Bruno Kola është shprehur i kënaqur për suksesin e arritur.

Sakaq i bukur ka qenë edhe finishi i kadetëve aty ku u mendua që Gjergj Zefi, kampioni i djeshëm i kronometrit, do të ishte sërish kampion. Por ai ka gabuar në taktikë në metrat e fundit duke i dhënë mundësinë një çiklisti fierak të dilte i pari ndërsa në vend të dytë është renditur Pandeli Bajlozi i Skënderbeut dhe supriza e vendit të tretë ka qenë Samuen Bajrami i Vllaznisë. 15 vjeçari që ka vetëm pak muaj që e ushtron këtë sport, ka bërë një paraqitje shumë të mirë, është ngjitur kësisoj për herë të parë në karrierën e tij në podiumin e fituesve.

Në vend të katërt dhe të pestë janë renditur dy çiklistët e tjerë të Vllaznisë Gjergj Zefi dhe Defrim Dholla. Në këtë mënyrë, edhe kampionati kombëtar i vitit 2017 mbyllet me dominimin e ekipit shkodran që duket në një rrugë shumë të mbarë për rikthimin e këtij sporti sërish në nivele të larta.

Lexoni dhe kete

VLLAZNIA, NGUSHTOHET RRETHI I KANDIDATURAVE PËR TRAJNER

Shumë prej skuadrave të futbollit shqiptar kanë nisur të bëjnë planet për sezonin e ri …