KAMPIONATI U-17/ VLLAZNIA- INTERNACIONAL, SFIDA INTERESANTE

Përveç Vllaznisë së të rriturve, edhe ekipet e Akademisë Vllaznia do të jenë në fushën e lojës ditën e shtunë. Ato do të zhvillojnë ndeshjet e rradhës për kampionat pikërisht ndaj ekipeve respektive të Internacionalit. Këto takime janë të vlefshme për javën e 10-të të kampionateve dhe ishin planifikuar për t’u luajtur fundjavën që shkoi por u shtynë nga Federata Shqiptare e Futbollit për shkak të situatës atmosferike në vendin tonë. Sidomos ndeshja e 17 vjeçarëve në mes këtyre dy ekipeve pritet me shumë interes. Si Vllaznia që drejtohet nga trajneri Nefail Zhejani ashtu edhe Internacional që ka në pankinë shkodranin Elvis Plori, vijnë në këtë ndeshje me pikë të barabarta nga 22 dhe ndajnë vendin e parë dhe të dytë në renditje.

Padyshim që fitorja në këtë ndeshje do t’i japë kryesimin e renditjes dhe me shumë mundësi edhe titullin simbolik “kampion i dimrit”. Vllaznia U-17 në fakt ka bërë një hap të gabuar javën e kaluar kur humbi në Shkodër me rezultatin 0-1 ndaj Kukësit por gjithsesi ky ekipe ka treguar një performancë shumë të mirë në kampionat deri më tani dhe ka shumë besim se mund t’ia dalë të fitojë edhe ndaj Internacionalit të shtunën. Sakaq në ndeshjen e 19 vjeçarëve pritet të mos ketë shumë histori sepse miqtë nga kryeqyteti kanë një ekip më të dobët por gjithsesi futbollit nuk i dihet. Vllaznia që drejtohet nga trajneri Luan Zmijani ka bërë disa paraqitje jo të mira në këtë kampionat megjithatë përbërja që ka dhe stërvitja që zhvillon ky ekip, janë tregues i një kthese të mundshme dhe shumë shpejt, ai do të ngjitet në vendin që i takon.

Lexoni dhe kete

HIDHET SHORTI I MOSHAVE, EKIPET E AKADEMISË “GJEJNË” RIVALËT

Mesditën e së hënës në ambjentet e Federatës Shqiptare të Futbollit është hedhur shorti i …