TV Rozafa
Tradita e garave me biçikleta në mes nxënësve të shkollave 9 vjeçare është rikthyer sërish në Shkodër. Një e tillë është organizuar paraditen e së shtunës në by- passin e qytetit nga shoqata e çiklizmit Vllaznia, në bashkëpunim me Zyrën Arsimor Rajonale, Bashkinë Shkodër dhe Qendrën Kulturore të Fëmijëve.
Kanë marrë pjesë në këtë garë rreth 50 nxënës dhe në fund fitues i saj është shpallur Bekim Tafili i shkollës “Ruzhdi Daca”, në vend të dytë u rendit Arsid Teli i shkollës “Ndre Mjeda” dhe në vend të tretë Riad Muça po i shkollës “Ruzhdi Daca”.
Trajneri i çiklizmit i Vllaznisë, njëkohësisht edhe organizator i këtij aktiviteti, Leonat Kola, në një prononcim për mediat është shprehur se qëllimi ishte rritja e pasionit të nxënësve për biçikletën dhe njëkohësisht përzgjedhja e elementeve më të mirë për ekipin e Vllaznisë…
Dhe në fakt duket se kjo garë e ka bërë efektin e vet menjëherë. Fituesi i saj, Bekim Tafili është shprehur se e ka shumë pasion çiklizmin dhe do t’i bashkohet menjëherë ekipit të Vllaznisë…
Aktivitete të tilla pritet të rikthehen tashmë në traditë për t’u zhvilluar çdo vit sepse përpos faktit që i jep gjallëri jetës sportive në qytet, shërben edhe për promovimin e elementëve cilësorë që nesër a pasnesër mund të përfaqësojnë denjësisht Shkodrën dhe Shqipërinë në gara kombëtare dhe ndërkombëtare.