TV Rozafa
Pas titullit kampion, Vllaznia e futbollit të femrave ka fituar edhe Kupën e 9-të rradhazi të Shqipërisë. Ndeshja finale e këtij sezoni është zhvilluar pasditen e së hënës në stadiumin e Rrogozhinës, ajo ka patur përballë ekipin e Tiranës ndaj të cilit ka fituar me rezultatin e thellë 7-0.
Dy prej golave janë shënuar nga Megi Doçi, dy të tjerë nga Luçije Gjini, ndërkohë që kanë shënuar edhe Arbenita Curraj, Arlinda Kodra si dhe një autogol i Kotarjes. Pas përfundimit të ndeshjes është zhvilluar edhe ceremonia e dorëzimit të kupës dhe më pas në kampin shkodran ka shpërthyer festa.
Disa prej protagonistëve të ekipit të Vllaznisë, në prononcimin e tyre për televizionin Rozafa janë shprehur të lumtur për këtë sukses të rradhës dhe kanë premtuar se trofetë për ta do të vazhdojnë edhe në të ardhmen…
Për ekipin e Vllaznisë nuk do të ketë shumë kohë për të pushuar, sepse do të nisë vetëm pas pak ditësh përgatitjet për ndeshjet e Ligës së Kampioneve të Europës, ku edhe për edicionin e sivjetëm kanë synime ambicioze.